02 Aug 10 - 零售股有周期

最近看了陸羽仁- 頭條日報 這篇文章。

筆者持有六福集團(0590)，沒關係是否同意或不同意「投資的陸羽仁」的說法或計法，但覺得「投機者」某些觀點都很有趣。


陸羽仁 - 零售股有周期

記得去年差不多這個時候，我提到零售業會有景，當時話到明年(即今年)3、4月，以12月底為年結的零售股公佈業績時，零售股會炒一浸，如今睇番果然如此。

上周二收市後六福集團(590)公佈業績，截至3月底全年業績，六福大賺近一倍，業績好令股價炒過不亦樂乎，上周二公佈業績前夕收10.36元，公佈完再炒上，上周五收12.26元。唔好要求六福年年好似上年度盈利有93%增長，如果本年度有30 %盈利增長，?家呢個市盈率都未算貴，問題是盈利還能否快速增長呢？

我覺得零售股仍然有得炒，但有隱憂。「有得炒」呢句話係講俾「投機的我」聽，而「有隱憂」就是講俾「投資的我」聽。

我來自火星

我記得2000年科網潮時隻中華網(8006)上市，第一日市值炒到700億元，大過恒生銀行(011)。我當時同朋友話，如果家公司盈利升到穩定水平，以 10倍市盈率計(以盈利無大增長的公司)，即係家公司盈利穩定後，應有70億元盈利，我當時仲未點諗得到中華網點樣可以賺到70億喎？但啲朋友好似當我傻嘅一樣，佢哋問我：「你來自火星呀？」當時班朋友話科網股唔計PE啦？(咁計乜？)總之人人都大聲過我。

所以講起投資，唔係短炒，我會繼續抱一個「我來自火星」的態度，去估一家公司未來的盈利。問題是散戶係唔係咁易估出一隻股未來十年的盈利和現金流呢？

最多睇到一兩年都好叻啦，即使估一年，都係好重要的參考。以六福為例，佢係自由行政策的一大受惠者，除了09年上半年受金融海嘯影響業績略倒退，年年收入大增長。甚至可以咁樣靠估，如果無金融海嘯，佢年年純利增長是否平均有30%呢？

我哋又可否假設佢未來一年都有30%純利增長，本年度可以有6.9億元純利呢？

這種純屬靠估的「篤數」，準繩度相對有限。或者用另一個方法，六福至去年9月的中期盈利只有1.88億元，但到今年3月底的上年度全年盈利有5.3億，兩數相減，即係去年9月至今年3月半年賺咗3.4億，唔好講佢盈利大增，如果未來一年都維持到這個賺錢幅度，將呢個數乘二，到明年3月全年咪可以賺6.8億囉，咁啱又同上面話每年增30%個數好接近喎！六福?家60億市值，若明年估計盈利有6.8億，即係估計明年市盈率8.9倍，仲有水位噃！唔怕同大家講，呢啲估法好唔科學。

生意好無人知

回歸到一家公司營運的ABC，賺唔賺錢，一睇收入，二睇支出，睇收入就係講生意，睇支出零售業的支出不外乎幾樣，講入貨成本、講舖租、講人工，在香港做生意，舖租佔的比重愈來愈大。

先講收入，睇番六福上年度的生意，截至今年3月底在各地共有73家全資零售店，當中香港佔31家，內地佔36家。香港仍是六福的主要市場，佔佢總收入74%，而香港零售額有一半來自內地旅客。另外內地市場佔六福總收入雖然只16%，但在快速增長中，比對上年度升咗55%。

論支出，六福上年度開支唔會大，因為上半段整體經濟仍相當受金融海嘯影響，無論舖租和人工，都唔慌有乜增長，金飾物料價格更回落了。所以就出現一種好好的經營狀態，收入大增，成本持平，就大賺特賺，正式發達無人知。

租金升壓力大

今年情況不太一樣，主要係公司發達人人都知，成本跟住就會升，中港兩地都有加人工壓力，更大問題是租金成本在快速飛升中。你睇尖沙咀、銅鑼灣啲舖頭間間都天價成交，買咗貴舖的業主，租金回報得2、3厘，自然要大幅加租，讓租金回報追番上。

六福財務總監羅添福話，去年佢哋有三分一商舖要續約，平均加租7%。尖沙咀文遜大廈的分店，由於租金加幅太高，他們無法支持，9月便會遷出。市場消息話，3年前六福租下該舖時，月租約80多萬元，但業主要求加幅四成，六福拒絕續租。

六福面對租金與日俱升，本年度盈利能否保持快速增長，仍是一個謎。六福透露，今年第2季(即本財政年度第1季)在港澳的同店銷售增長約40%，內地則增長20% ，六福話，由於去年同期銷售數字偏高，預期下半年度的銷售增長將放緩至10%。

超正日子慢慢過去

我對數字較敏感，如果六福本年度上半年(至9月底)銷售增長30%，下年半(至明年3月底)銷售只增長10%，顯示去年那種「超正」的日子慢慢過去，面對租金等成本的上升，下半年度盈利可能好唔過。零售股有周期，生意好但成本急升，業績會慢慢開始從高峰滑落。

總的來說，好像六福那樣的零售股由於剛公佈理想業績，現時仍在炒作中，特別是同業周生生(116)快將公佈中期業績，周生生更是短炒對象，若中期業績對辦，仍可以多炒一段，所以千萬不要睇完我話零售業受租金上升壓力，你就走去沽零售股。到明年開始可能成本又高啲又麻煩啲啦，但買股票睇得太超前好有問題，特別是「投機的我」更加好難怕得咁多。「投資的我」就要明白風險，可繼續持有，到業績有唔對辦的瞄頭止。