節錄曹Sir 部份投資心法。
不聾不啞不配當家 ， 2008年09月12日
投資四忌獲取財富五道
投資四大忌：一、响牛市中過分保守。二、响熊市中過分進取。三、Time the market。四、錯信股票經紀或投資顧問。為針對上述缺點，响牛市中記住七三分（70％資金投入股市），响熊市中三七分（30％資金投入股市），唔好尋頂同埋尋底。唔好信人只可信自己。Get wise,Get wealthy and get healthy。人年紀大咗應該聰明咗、富有咗同時保持健康，上述方法可以防止你太進取或者太保守，亦唔需要Time the market。
一旦熊市形成，減持至30％股票，雖然有所損失，但仍然有70％現金响手，令你安心快樂。牛市形成，則改為70％投資股票，仍有30％現金在手，可令人聰明及有智慧，不但心平氣和，同時可安享自己嘅消閒時間。中秋已到，朋友，你快樂嗎？
獲取財富之道：A、記住資產分配程式（Asset Allocation Model），牛市七三分、熊市三七分。B、嚴守止蝕唔止賺。虧損15％要注意，虧損20％便止蝕。C、唔好過分分散、唔好過分集中，最多揸十隻八隻，最少揸四隻、五隻股份已經足夠。D、時間响自己嗰一邊，如用五年、十年、二十年，而唔係希望一朝發達。E、如非專業，每天花二十分鐘响自己投資分析上面已經足夠，唔好一曝十寒（心情唔好便唔理），亦唔可以埋頭埋腦（我老曹朝十晚十係因為我老曹有份工，明年退休後，每日只花二十分鐘就已足夠）。
商品牛市玩完 ， 2008年08月13日
1971年我老曹第一次跟位大馬主朋友入馬場，佢話畀我老曹知佢隻馬贏梗，我老曹用咗500元（當年月薪只得1500元）買Win，結果佢隻馬跑第二，跑第二買Win係冇錢賠嘅，從此我老曹就唔再賭馬，因為我老曹感覺唔到娛樂性，加上要花太多精神喺揀馬上，甚至跑第二而買Win都冇錢分。過去一直同呢位大馬主保持聯絡，直到1997年佢問我老曹借錢，禮拜六要我老曹到銀行等佢；銀行經理同我老曹傾計時問我等邊個，當佢知道係等某某，佢話呢個大馬主近日財政有問題，小心借出去嘅錢冇得還，於是我老曹離開銀行，從此冇咗呢位朋友。不過，佢嘅揀馬方法我老曹應用喺股市上又幾有用。
六招揀股／馬策略
一、唔好場場賭；有心水先賭，冇心水就唔好賭。
二、跑第一叫Win、跑第二叫Place及跑第三叫Show，其他唔使理。跑馬嘅目的係一場馬中點樣揀出第一、二及三；股票亦一樣，要買就買龍頭股，其他唔使理。
三、揀贏出嘅馬難，揀會輸嘅馬容易；一場馬如能剔除50%跑唔出嘅馬，你便贏梗。其實買股票何嘗唔係咁呢？森池兄亦經常喺恒指成分股中揀其中一半投資；策略就係嚟自呢位大馬主。
四、大熱唔買、大冷唔買。賠率少於一點二倍唔買，賠率大過一點五倍唔買；因為大冷經常跑唔出，大熱亦經常倒灶，最好買半冷門（即中價股）。
五、孖T唔買、三T唔買及過五關者唔買，因為贏面極低。上述只係博彩唔係分析；換言之，期指、期權及衍生工具贏面不及股票。
六、Do your Homework。例如睇晨操、研究馬匹嘅狀態、品種及脾性等，唔同嘅場地及天氣往往有唔同嘅結果。
上述六招賭馬法係咪有用，唔清楚，因為1971年第一次輸錢後我老曹便冇咗興趣，反而將賭馬嘅策略用喺買股票上，卻發現幾有用。
今天傳媒紛紛患上政治狂躁症，保持獨立思考及頭腦冷靜愈來愈重要。
電視機上觀眾往往問分析員某股短期點睇？我老曹常發笑。正確嘅答案係：「如果我知，都唔使上電視啦！」又或者係：「甚至我知，點解要免費話畀你知？」唔炒短線者係幾十年經驗纍積嘅結果，其中95％同分析市場心理技術有關，係唔會免費教人嘅。正係會考狀元年年有，股市炒手最難求。
我老曹從來唔信散戶喺短線中有出色嘅表現，一如未經訓練者又點樣喺奧運中攞金牌嘅道理一樣。
老曹日記 ， 2008年07月06日
投資四大謬論
一、P/E係反映過去業績嘅結果而唔係預測未來嘅工具。P/E四十倍股份應睇好定睇淡？如未來一年嘅純利可上升100％，P/E四十倍點解唔買？相反．P /E十倍股份係唔係抵買？如果未來一年公司出現虧損，咁P/E十倍嘅股份一D吸引力都冇。P/E高低由G（增長率）所管轄，投資者應買增長嘅股份（Growth Stocks），而唔係低P/E嘅股份。只講P/E唔講G者，係唔懂P/E理論，人云亦云，可能佢連P/E理論亦未睇過。其次係行業周期，例如2001年資源股P/E雖然高但唔怕買，因為資源業正進入上升周期（由1980年起，一直衰到2000年，衰足二十年）。相反，今年資源股低P/E都唔好買，因為佢地可能見頂。
二、太早止賺可令你破產。2007年嘅上半年，唔少人呱呱叫泡沫經濟，喺恒生指數22000點前早已放晒貨止賺。點知恒指去年8月只回落到20000點就止跌回升，9月份便到處問人好唔好高追？人地叫佢睇睇，佢就唔敢入貨。到咗10月份，股市實在太燦爛，人地叫佢唔好高追，佢亦聽唔入耳（心諗9月份你地叫我唔好高追，累我賺唔到錢）。喺10月份入飽貨後，股市卻大幅回落，由於喺30000點水平先入貨，自然唔肯止蝕。到今年3月嚇死先止蝕（50天線跌穿 250天線）。4月時又心大心細，5月又再高追……。請記住投資市場只有止蝕唔止賺，從來冇止賺呢回事。相信止賺盤者永遠唔會係股市內嘅大贏家！甚至 10％到15％止蝕盤亦不宜機械式運用，例如一旦確認行業進入上升周期，或確認牛市已開始時，買入後甚至股價回落10％到15％亦唔駛止蝕。只係一般人唔知咩叫當頭起。因此，對幾時應放棄止蝕盤並唔係容易掌握。
三、投資宜集中，不宜分散。專業投資者最多亦只可持有十隻股票，一般投資者最多只可獱住五隻股票。超過上述數目係自找麻煩；五隻股票中總有一、二隻跑出，嗰時更應該進一步集中（因溝上唔溝落），請賣晒蝕本貨，增持賺錢貨，而唔係賣晒賺錢貨而去買蝕本貨（平嘢冇好，好嘢冇平）。投資同生仔一樣，貴精唔貴多。
四、名氣無用論。今年上半年巴郡股價跌咗19％（同期標普五百只跌14％），連畢非德都跑輸大市。證明過去嘅成功，唔保證未來嘅成功；名氣愈大，未來成功嘅機會愈小。
事業成功帶畀你自由去做你想做嘅事、想去嘅地方或想提供乜嘢畀家人？甚至係協助人地嘅能力及對社會提供服務嘅能力。成功可能係辛勤工作後嘅代價；亦可能係投資成功後嘅回報。不過，但有一點十分肯定嘅係，人生目標唔係為積聚財富，而係點樣運用財富以達到利己同利人嘅目標。財富分兩類，即物質上嘅財富及精神方面（二十年前影星麥嘉同我老曹講心中富貴）。物質財富可用金錢衡量，但精神財富冇法衡量。愛你嘅家人、朋友、社會及國家，只有咁樣你先獲得真正嘅快樂。 2003至07年前，本欄較強調點樣獲得物質財富。2008年踏入熊市後，相信精神財富來得更重要。例如修養、文化同愛心，相信只有兩者兼得，才有快樂嘅人生。
老曹日記 ， 政府高官自以為老闆 ， 2008年06月06日
投資3條
投資第一條：有智能不如趨勢。例如1997年8月至2003年3月大趨勢系向下，做好友事倍功半；2003年3月到2007年10月大趨勢向上，做好友則事半功倍。
投資第二條：大氣候與小氣候；大方向向上，亦有逆市下跌股；大方向向下，亦有逆市上升股。瞭解大方向後，必須留意唔同行業（sector）本身盛衰週期。
投資第三條：唔好跟大隊。太多好友時唔入貨，太多淡友時唔拋空。
港股成吸金機器 ， 2007年10月12日
身落細價股即是賭
小部分讀者來信對我老曹有非分要求而作出出乎意料投訴。我老曹再重申一次：我老曹係冇預測能力，一如大部分人一樣，有時睇得準，亦有時睇錯。只要你精於揀股同時學曉掌握時機，投資細價股都幾好玩。好多人所犯錯誤就係將身家性命財產都落去一隻細價股身上，呢D叫做賭，唔係投資！
如只將財富10％投放一隻細價股身上，一旦虧損15％或以上便止蝕，如上升便住唔放，往往帶來幾可觀回報（例如100％、200％，甚至五倍、十倍回報）。有個化妝品廣告用西班牙建築界權威句話：Less is more（建築界叫做簡約），其實財經界亦管用。如你只用財富10％去投資二線股，你可以守落去……，類似例子如第一拖拉機（038）、廣船（317）、南方航空（1055）、有利建築（406）等，都產生Less is more效果，其回報係100％、200％……，而你唔需要係投資界天才，只要科學化篩選二線股便可。一如麻鷹空中盤旋，直到見到獵物，便以閃電速度攫取，如有利潤便死不放（止蝕唔止賺）。當然，獵鷹亦有失手時刻，但只要擊中一次，便可以用1萬元賺取2萬元……，如此類推。我地挑選係 Millionaire-Maker Stock，唔係追隨大市升降大藍籌股，例如畢非德透過投資中石油，幾年便賺取600％以上利潤。最吸引係D轉虧為盈二線股，呢類股份往往可爆炸性上升。
有D股份擁有其他公司所冇特權，例如港交所（388），政府保護下，本港只能有一間交易所，別人無法侵佔其利益，回報往往十分驚人。
有D股份曾出現一、兩年烏雲掩蓋期，例如偉易達（303），曾因一次收購出現錯誤而出現一、兩年業績倒退，然後重整旗鼓。各位可嘗試搵其他類似偉易達股份去投資。有D股份出現純利突破期，例如過去曾推介精優藥業（858），糖尿病藥研究上有突破性進展。
有D股份經重新包裝後市場佔有率狂升，例如美國蘋果透過iPod獲得龐大盈利。有D股份出現行業性改變，例如2001年資源股。
學習享受失敗
投資二線股策略係Double或虧損15％離場，但唔好感情用事。勝敗乃兵家常事，千萬不可有輸唔起心態。我老曹曾同詹瑞文兄演舞台劇（影碟最近豐有提供），強調EYF（享受你失敗）。其實，每一次失敗都令你更接近成功，聰明人從失敗中悟出成功秘訣，只有愚蠢人先至會倒地不起。請唔好再受恒生指數見29000點所困擾，學習篩選股份。投資二線股之道係細細注、大大聲（Less is more）！唔好後悔過去曾錯過機會，請為自己未來夢想而努力，學習如何Double Your Money！去年係內地航空股，今年係建築股，明年高科技股？1986年如你投資10萬美元微軟上，今天你擁有2300萬美元！Google 2004年8月以85美元上市，最近市價已超過600美元，即呢間公司市值1870億美元，已八倍於通用汽車（1953年通用汽車係美國最大上市公司）。
SOHO中國（410）10月8日成功來港上市後，主席潘石屹透露集資所得主要用作擴張土地儲備。依家公司只有120萬平方米，呢次集資128.6億元，將集中投資北京市中心商業區，建立高端物業。SOHO中國今年利潤目標已完成，2008年利潤目標亦完成超過30％，資金用作未來計劃。
1978年改革開放政策落實，1979年深圳作為試驗特區，形成大珠三角，過去十年粵港一體化係另一成功例子。長三角同環渤海由於較大珠三角遲十年起步，眼見過去十年粵港一體化取得成就，最近提出「中國六大都市圈」藍圖，即將全國一線城市如香港、深圳、廣州、北京、天津、上海連在一起互補長短。上述六大城市包括大珠三角、長三角及環渤海，佔全國20％人口，但佔全國40.6％ GDP；計劃到2020年，六大城市以軌道交通、超級公路連在一起，成為世界上少有「六大都市圈」，有機會成為全球最繁盛「都市圈」！透過建立更公正法制、更透明政府運作、更具活力商業活動、更高文化及研究水平（因為全國最著名研究機構及高校都集中六大都市，係全國人口中接受教育最高水平城市，亦係最高收入城市、最高醫療水平城市、開發資金聚集最多城市……），達致全球最繁盛都市圈目的。
港股成吸金機器 ， 2007年05月
投資格言：
一、唔好將失敗的投機轉為投資，不然只會損失更多！
二、買入後股價如跌10％，必須檢討自己投資策略係咪出錯；如損失擴大到15％，便不理三七廿一沽之哉！
三、損失就係損失，唔好以為未賣就唔係。
四、只有酒樓侍應才問客人的貼士，如你投資時仍信貼士，你已經失敗。
五、賺錢唔係賣出股票的理由，賣出的真正理由應該係因為形勢有變。
六、不怕失去機會，只要有資本，明天又有另一個機會。
七、博反彈係極之專業的行為。如你並非投資專家，便不應加入博反彈行列。
八、唔做功課投資者最終一定蝕本離場。
任何行業愈來愈專業係無可避免的事，以為只靠「劃走勢」便可發達的日子早已一去不返。今天欲在股票市場賺錢，除左必須懂得行業分析外，更須知道「誰」係龍頭股
識走勢的人唔會輸死，唔識走勢的人亦唔會輸死，半桶水的人卻遲早浸死！學一門技巧必須功夫深，千萬不可學完三腳貓功夫，就以為自己係李小龍。
錢跟精叻人走，如你愚蠢，切莫學人投機；如你知道自己蠢仲有得救，天下最愚蠢的人就係唔知自己蠢，咁就真係冇得救。你係醫生，只代表你在醫術方面有專業，但唔代表你在投資上同樣係專業。你係大學教授，只代表你在學術上係專業，同樣唔代表你在投資上係專業。
投資就係找尋趨勢，唔係短期，而係中長期，然後追隨它
投資唔係遊戲，首先應制訂策略，然後依照計劃行事。未認識股市前，先認識自己點解買入，唔係話你好快會加入80％輸家行列。一旦犯錯，唔好搵藉口，立即行動止蝕！唔好讓小問題演變成大問題，進一步變成無可挽救問題。止蝕愈快愈好，唔好因虛假的期望阻礙你行使止蝕，錯左立即承認，採取行動止蝕，然後搵更好的投資項目！「希望永遠在人間」係講畀失敗者聽的謊言！唔好信。
2006年11月24日
股市方面，請停止day trade，應花心機二線股身上。部分二線股可令投資者一年內投入資本上升一倍、兩年內升兩倍、三年內升四倍……上述例子十分多。二線股良莠不齊，如冇花心機落去研究，往往買錯無良股份！今時今日股票投資早已專業化，唔願花時間去研究個別股份者，請停止買賣，以免累己累人
二線股利之所在
根據資料，過去五十年本港投資優質二線股，乃致富之道。今天唔少藍籌股三十年前亦係二線股，思捷環球（330）五年前仲係二線股，利豐（494）十年前一樣係二線股。美國Ibbotson Associates資料研究公司翻查美國過去八十年股票歷史（由1926年至今），如1926年投資一萬美元十隻優質二線股身上，到今年價值係三千九百六十萬美元！最易賺錢方法係眼見自己投資二線股漸漸變成藍籌股。投資就係找尋邊一隻股票係明天思捷或利豐？林治著作中話：投資二線股令佢十三年內資本升值二十七倍，所以四十六歲便退休去享受人生！今天微軟、沃爾瑪，過去亦曾經係二線股；甚至通用電氣，一百年前亦係二線股！Google五年內由二線股變成互聯網巨無霸。可惜二線股大行好少推介（因為佣金收入有限，唔值得花心機），卻係投資者利之所在。
近年衍生工具大為流行，令財富轉移速度更快，雖未至三更窮、五更富，但今年同1997年比較，香港已轉變太多，有人由富有變貧窮，有人由貧窮變富有。唔好話讓財富保持年率25％速度上升，即使連保存財富亦有困難。我老曹身邊朋友有D變得更富有，亦有D變成一無所有。有人1997年前房地產方面過分進取而失去所有，有人因投身科網熱而傾家蕩產，亦有人利用內地企業興起，令家財以倍數上升。潮起潮落，不知淘盡幾許英雄好漢！時也、命也、風水也？總之財富來時，擋也擋不住；財富流失之時，留也留不住。
總結我老曹三十八年投資經驗：
一、股市係不可預測，只可追隨趨勢。
二、股價最終由基本因素決定，但投資者情緒可令股價由一個極端走向另一個極端。
三、買股票之時多注重價值（valuation），因股價最終反映公司價值。
四、展望可能短期不能實現，但有耐性經常獲得回報。
上述四點似乎好老土，但絕對係金石良言。
曹仁超給年輕投資者的十二個忠告
曹仁超給年輕投資者的十二個忠告
一、溝上唔溝落。如你手上嘅投資已略有損失，千萬不可加注。
二、學習「無良」嘅外籍僱傭兵（只幫打贏嗰邊去打仗），如趨勢向上便做好友，一旦趨勢向下便做淡友，唔好立場死硬。
三、資本分兩種，有形嘅一種係金錢，無形嘅一種叫智慧。如你只擁有金錢而冇智慧，遲早喺投資市場輸死；如你只擁有智慧而冇金錢，你只係一名好好嘅講者。成功投資者不但擁有金錢，同時擁有智慧，缺一不可。世上金錢易得，智慧難求。
四、唔好希望低價買入、高價賣出，上述方法冇人可以做得到，應該係「高價買入，低價賣出」！（高價係指股價由低位上升10％到15％之後，即寧買當頭起；低價係指股價由高價回落10到15％之後，即賣出當頭跌嘅股份）。
五、升市莫估頂，跌市勿猜底，因為你永遠唔知頂喺哪裏及底响何方。
六、永遠買入強勢股、沽出弱勢股。喺股市中應鋤弱扶強，唔係鋤強扶弱。
七、利用基本因素去分析事物，利用技術分析去決定買賣時刻。
八、盛衰循環乃不易道理，經濟周期進入興盛期，不妨大手D吸納；當經濟上升周期進入尾聲之時，小注可怡情。
九、了解群眾、追隨群眾，最終係同群眾對着幹。當群眾哭泣、上街抗議之時，乃入市時機；當群眾歡呼之時，乃出貨時機。當中區大塞車之時，亦係出貨好日子。
十、福無雙至，禍不單行。跌市來之時往往狂風掃落葉，唔會陰風細雨（It never rains but pour)。
十一、止蝕要快（例如虧損10％或以上立即行動），有錢賺不妨滋油淡定慢慢來，賺盡佢，只有年輕人才慌死賺唔切。
十二、紙上談兵易、行軍遣將難。嗰D教你「如何賺取一億元」嘅書千祈唔好睇（通常都係紙上談兵）。
沒有留言:
發佈留言